LEO NDIO MTAYAONA MAKALI YA MNYAMA SIMBA SC TAIFA

Simba SC

Na Mahmoud Zubeiry

SIMBA SC, mabingwa wa soka Tanzania Bara, leo watamenyana na waliowahi kuwa mabingwa wa Kenya, Sofapaka FC, Uwanja wa Taifa, Dar es Salaam kuanazia saa 10:00 jioni.

Katika mchezo wa leo, mashabiki wa Simba SC wa Dar es Salaam, yalipo maskani ya klabu hiyo katika Mtaa wenye pilika nyingi, Msimbazi, watawashuhudia wachezaji wapya wa kigeni, mabeki Paschal Ochieng, Komabil Keita na mshambuliaji kutoka Ghana, Daniel Akuffo.

Ochieng amesajiliwa kutoka AFC Leopard ya Kenya, Keita kutoka Stella Abidjan ya Ivory Coast na Akuffo kutoka Hearts Of Oak ya Ghana na wote hawajawahi kucheza Uwanja wa Taifa, hivyo leo itakuwa mara ya kwanza kwao na mashabiki wa Simba wana hamu sana ya kuona silaha hizo mpya.

Lakini kikubwa ni kushuhudia mseto mpya wa timu yao kuanzia safu ya ulinzi, kiungo hadi ushambuliaji na namna timu yao ilivyoiva baada ya kujifua kwa zaidi ya siku 40, ikijiandaa na msimu mpya wa Ligi Kuu.

Simba, ambayo mara ya mwisho Simba ilicheza Dar es Salaam Agosti 8, na kufungwa mabao 3-1 na City Stars ya Nairobi, Kenya Uwanja wa Taifa, kwa zaidi ya mwezi mmoja ilikuwa kambini Arusha ikijifua vikali kujiandaa na msimu mpya wa Ligi Kuu ya Vodacom Tanzania Bara, ambao wao ni mabingwa watetezi. 

Kwa sasa kiwango cha Simba, inayofundishwa na Mserbia, Profesa Milovan Cirkovick, akisaidiwa na Mganda, Richard Hamatre, kipo vizuri na timu inaonekana iko tayari kwa Ligi Kuu.

Pamoja na Jumapili kulazimishwa sare ya 1-1 na Sony Sugar ya Kenya, Uwanja wa Sheikh Amri Abeid mjini Arusha, lakini Simba ilicheza soka safi na washambuliaji wake walikosa mabao ya wazi zaidi ya matano.

Lakini hata hali mbaya ya Uwanja wa Sheikh Amri Abeid katika eneo la kuchezea inachangia kupunguza idadi ya mabao kwa Simba. Katika mechi tatu ambazo Simba imecheza kwenye Uwanja huo, imevuna mabao matano na kufungwa matatu, na kikwazo kimekuwa kikionekana ni hali ya eneo la kuchezea.

Katika mchezo wa Jumapili, bao la Simba lilifungwa na Daniel Akuffo, wakati Komabil Keita alijifunga katika jitihada za kuokoa na kuwapa Wakenya bao la kuongoza. Awali, Simba ilicheza mechi mbili Arusha, dhidi ya Mathare United ya Kenya na JKT Oljoro ya Arusha, ambazo zote ilishinda 2-1, mshambuliaji mpya Daniel Akuffo kutoka Ghana akifunga bao moja kila mechi, Kiggi Makaasy na Mrisho Ngassa wakifunga mabao mengine.   

Kitu kimoja tu ambacho Milovan anapaswa kuendelea kufanyia kazi ni makosa ya safu ya ulinzi na mawasiliano duni na makipa wao.

Ilivyo sasa kipa yeyote anayesimama kwenye lango la Simba SC, kabla ya kuchunga wachezaji wa timu pinzani, anakuwa na jukumu la kwanza la kujihadhari na mabeki wake wasimfunge, kwani mabeki wawili wa kati wa timu hiyo wamekwishaonyesha ‘kipaji  cha kujifunga’ katika mechi za karibuni, Juma Nyosso na Komabil Keita.

Simba inajiandaa na mechi ya Ngao ya Jamii Septemba 11, mwaka huu, Uwanja wa Taifa, Dar es Salaam dhidi ya Azam FC, ambayo kihistoria hiyo itakuwa mechi ya tano ya Ngao ya Jamii kuchezwa nchini na ya pili kukutanisha timu nje ya wapinzani wa jadi wa soka ya Tanzania, Simba na Yanga.

Mtibwa ilicheza na Yanga mwaka 2009, baada ya Simba kugoma na ikashinda mabao 2-1 na kutwaa Ngao, wakati kabla ya hapo, mwaka 2001, Ligi Kuu ya Tanzania ikiwa bado inadhaminiwa na Kampuni ya Bia Tanzania (TBL), kupitia bia ya Safari Lager, ilichezwa mechi ya kwanza ya Ngao kihistoria.

Katika mechi hiyo, Yanga ilishinda mabao 2-1 dhidi ya Simba na mwaka juzi Yanga iliifunga tena Simba kwa penali 3-1 kufuatia sare ya 0-0 na mwaka jana, Simba ilitwaa Ngao ya kwanza katika historia yake, kwa kuifunga Yanga mabao 2-0. 

MABINGWA WA MECHI ZA NGAO YA JAMII:

Mwaka          Mshindi   Matokeo

2001               Yanga       2-1 Simba

2010               Yanga       0-0 Simba (3-1penalti)

2011               Simba       2-0 Yanga

Thursday, September 06, 2012