BARCA YAMSAFISHA MESSI KASHFA YA UBAGUZI

Advertisement

Lionel Messi

Drenthe

KLABU ya Barcelona imemtetea Lionel Messi dhidi ya tuhuma za ubaguzi alizotupiwa na Royston Drenthe.

Mholanzi Drenthe, ambaye kwa sasa anachezea Everton kwa mkopo, akitokea Real Madrid, alidai Messi alimuita "negro" mara kadhaa wakati akicheza Hispania.

Barcelona imeyapuuza madai hayo na kusema Messi hana tabia hiyo.

"Mchezaji huyo wakati wote amekuwa akionyesha heshima kwa kiwango kinachotakiwa na uanamichezo kwa wapinzani wake," alisema Msemaji wa Barca.

Drenthe mwenye umri wa miaka 25, akiwa katika mwaka wa mwisho wa mkataba wake Real Madrid, msimu huu amecheza kwa mkopo Goodison Park, lakini hivi karibuni alienguliwa kwenye kikosi cha David Moyes kwa utovu wa nidhamu.

Alijiunga na Real akitokea Feyenoord mwaka 2007 na msimu uliopita alichezea kwa mkopo Hercules ya Hispania.

Pamoja na kumuita negro mara kadhaa, Drenthe alidai mara ya mwisho alipokutana uwanjani na Messi, pia aligoma kupeana naye mikono baada ya mechi.

Jana, Ligi Kuu ya Hispania, Primera Liga ilisema haijapanga kumchukulia hatua Messi.

Friday, May 11, 2012