MTIBWA YAUA 5-0 SUPER 8, KISIGA 'MALONE' NI NOMA

Na Princess Asia, Zanzibar

SHAABAN Kisiga ‘Malone’ aliyekuwa anacheza soka ya kulipwa Uarabuni, amerejea nyumbani kwa kishindo, safari kama mfungaji hodari wa mabao na si mpishi tena kama alivyozoeleka.

Kiungo huyo wa zamani wa Bandari ya Mtwara, SC Villa ya Uganda, Simba SC na Azam FC za Dar es Salaam jana alifunga mabao mawili wakati timu yake mpya, Mtibwa Sugar inaifunga 5-0 Super Falcon katika michuano ya BankABC Sup8r kwenye Uwanja wa Amaan,m Zanzibar.

Kisiga ambaye aliporejea nchini kwanza alienda kuomba kusajiliwa Simba SC wakampotezea, sasa amefikisha mabao matatu na anachuana na chipukizi wa Simba SC, Christopher Edward kuwania kiatu ncha dhahabu cha michuano hiyo.  

Katika mechi hiyo ya jana, mabao mengine ya Mtibwa yalifungwa na Ally Mohamed ‘Gaucho’, Mohamed Mpoki na Dickson Daudi.

Mtibwa sasa imeungana na Azam iliyoshika nafasi ya pili Kundi B, Simba na Jamhuri kutoka Kundi A kutinga Nusu Fainali ya michuano hiyo.

Simba ilitinga Nusu Fainali ya michuano ya BankABC Sup8r kwa kishindo jana, baada ya kuifunga Zimamoto ya Zanzibar mabao 2-0 kwenye Uwanja wa CCM Kirumba mjini Mwanza, mabao yake yote yakifungwa na kiungo chipukizi anayeinukia vema katika soka ya Tanzania, Christopher Edward kipindi cha pili.

Christopher ambaye hukomazwa pia kwenye kikosi cha timu ya taifa ya Tanzania, Taifa Stars na kikosi cha kwanza cha Simba, alifunga bao la kwanza penalti dakika ya 50, baada ya beki Miraj Adam kuangushwa kwenye eneo la hatari.

Edward ambaye ni kipenzi cha kocha Mserbia wa Simba, Profesa Milovan Cirkovick, alifunga bao la pili dakika ya 55 baada ya kuwapiga chenga mabeki watatu wa Zimamoto kabla ya kumchambua kipa wa timu hiyo ya Zanzibar.

Pamoja na Simba SC kuwania ubingwa wa michuano hiyo, lakini sasa Christopher ameingia kwenye mbio za kiatu cha dhahabu cha michuano hiyo, kwa kufikisha mabao manne, akiwa anaongoza akifuatiwa na Kisiga.

Katika michezo mingine ya kuhitimisha hatua ya makundi ya michuano hiyo jana Uwanja wa Chamazi, Jamhuri FC iliichapa 4-0 Mtende, zote za Zanzibar mabao ya washindi yakifungwa na Sadik Rajab dakika ya 20, 44, Issa Achimwene aliyejifunga dakika ya 82 na Suleiman Khatib dakika ya 88.

Kwenye Uwanja wa Ushirika mjini Moshi, Azam FC ilitoka nyuma kwa bao 1-0 na kuifunga Polisi Moro FC mabao 2-1, mabao yake yakitiwa kimiani na beki Said Mourad dakika ya 20 na Abdi Kassim ‘Babbi’ dakika ya 70, wakati la Maafande wa Morogoro lilitiwa kimiani na Mokili Rambo dakika ya kwanza. Polisi ilimpoteza mchezaji wake, Abdallah Rajab dakika ya 88 aliyetolewa nje kwa kadi nyekundu.

Katika Kundi A, Simba SC imeongoza kwa pointi zake nne, baada ya kutoa sare moja na kushinda moja, ikifuatiwa na Zimamoto na Mtende zinazofungana kwa pointi tatu kila moja, wakati Jamhuri inashika mkia kwa pointi yake moja.

Kundi B, Mtibwa inaongoza kwa pointi zake tisa ikifuatiwa na Azam FC na Polisi Moro, zenye pointi tatu kila moja, wakati Falcon inashika mkia, ikiwa haina pointi hata moja.

Wakati hatua ya makundi inamalizika leo, mechi za Nusu fainali na fainali zote zitachezwa Dar es Salaam. Mdhamini wa michuano hiyo, Banc ABC anagharamia usafiri wa ndege kwa timu zote kutoka kituo kimoja hadi kingine, malazi na jezi.

Kanuni za mashindano haya ni kushirikisha timu zilizoshika nafasi tatu za juu katika Ligi Kuu za Bara na visiwani na mbili zilioongoza katika kupanda Ligi Kuu zote mbili, lakini kwa Bara, Yanga waliokuwa washindi wa tatu msimu uliopita, walijitokea na nafasi yao ikachukuliwa na Mtibwa Sugar ambayo ilishika nafasi ya nne kwenye Ligi Kuu.

Bingwa wa michuano hiyo mipya itakayokuwa ikifanyika kila mwaka, ataondoka na Sh. Milioni 40, mshindi wa pili Sh. Milioni 20, wa tatu Sh. Milioni 15 sawa na wa nne, wakati washiriki wengine wataondoka na Sh. Milioni 5 kila moja.

NUSU FAINALI

Agosti 15, 2012

Mtibwa Sugar Vs Jamhuri (Saa 8:00 mchana)

Simba SC Vs Azam FC (Saa 10:00 jioni)

(Uwanja wa Taifa, Dar es Salaam)

KUNDI A

                   P   W  D  L   GD     P

Simba B       3   2   1   -    3         7

Jamhuri FC  3   1   1   1   2         4

Zimamoto     3   1   -    2   -1       3

Mtende FC   3   1   -    2   -5       3

MATOKEO/RATIBA  

Agosti 5, 2012

Simba SC 1-1 Jamhuri FC

Zimamoto FC 2-3 Mtende FC

Agosti 9, 2012

Jamhuri FC 0-2 Zimamoto FC

Mtende FC 0-2 Simba SC

Agosti 12, 2012

Simba SC 2-0 Zimamoto FC

Jamhuri FC 4-0 Mtende FC

KUNDI B

                   P   W  D  L   GD     P

Mtibwa         3   3   -    -    8         9

Azam FC      3   2   -    1   3         6

Polisi Moro  3   1   -    2   -1       3

S. Falcon      3   -    -    3   -9       0

MATOKEO/RATIBA

Agosti 5, 2012

Super Falcon FC 0-2 Azam FC

Agosti 6, 2012

Mtibwa Sugar FC 2-1 Polisi Moro FC

Agosti 9, 2012

Azam FC 0-2 Mtibwa Sugar FC

Polisi Moro FC 2-0 Super Falcon FC

Agosti 12, 2012

Azam FC 2-1 Polisi Moro FC

Super Falcon FC 0-5 Mtibwa Sigar FC

Monday, August 13, 2012