SERENGETI BOYS YATINGA FAINALI CECAFA, YAFUZU AFCON U17

TANZANIA imefanikiwa kwenda Fainali ya michuano ya vijana chini ya umri wa miaka 17 ya CECAFA baada ya ushindi wa mabao 3-1 dhidi ya Kenya mchana wa leo Uwanja Abebe Bikila nchini Ethiopia.
Mabao ya Serengeti Boys kwenye mchezo huo wa michuano ya kufuzu Fainali za Afrika ‘U17 AFCON CECAFA Qualifiers’ yamefungwa na Nhingo Luzelenga dakika ya 20, Luqman Mbalasalu dakika ya 30 na Sonn Shaaban dakika ya 90’+4.
Sasa Tanzania itakutana na mshindi wa Nusu Fainali ya Pili kati ya wenyeji, Ethiopia na Uganda wanaomenyana baadaye leo hapo hapo Uwanja wa Abebe Bikila, Addis Ababa.
Aidha, ushindi huo unamaanisha Tanzania imejikatia tiketi ya Fainali za Kombe la Mataifa ya Afrika kwa vijana chini ya umri wa miaka 17 mwakani nchini Morocco. Bingwa wa michuano hiyo ya CECAFA na mshindi wa tatu nao watafuzu AFCON U17. 

Sunday, November 30, 2025